V Festa - exaltación do Caldo Galego en Arzúa

O sábado 2 de febreiro, a Orde Caldaria da Asociación de Veciños de Santa María de Arzúa, volve celebrar un ano máis a Festa de exaltación do Caldo Galego.

Ás 14:30 horas, será cando se inicie a degustación do caldo, pero antes fixenlle unha entrevista (mentres cociñaba) a "Pila", unha das grandes cociñeiras da tradición en Arzúa, que todos debemos recoñecemento por ter unha man especial para este prato.

Espero que vos aproveite a todos...

Gonzalo.

Preparación: (extraída de gastronomiagalega.com)

Ponse a cocer un pouco unto e a carne de porco (un óso, ou un anaco de lardo e coiro de xamón, ou un cacho touciño ou de cachola…), e unha presa de fabas (previamente postas unhas horas a remollo). Media hora ou 3/4 despois bótanse as patacas picadas, (hai quen as bota cando a verdura, pero nesta zona bótanse antes, para que vaian "facendo a auga", dándolle a cor abrancazada e a espesura característica), media hora ou 3/4 despois bótase a verdura, lavada e picada. Antes de botar a verdura pódese retirar o xamón e o unto, o unto porque logo é difícil de atropar, e sen el ten mellor presentación, e a carne para servila aparte se ten anacos aproveitables. En tempos o óso de xamón reservábase para usalo outra vez. Cando a verdura coza outra media hora ou así xa está listo para servir.

O caldo admite moi ben o requentado, incluso mellora na segunda vez que se consume (a menos que vaia calor, que aceda, polo que convén gardalo ó fresco ou na neveira). Tamén admite ben a conxelación.